Bloß wegen eenem Wort
Johann dat wehr e Juggesell,
e ohlet, drolljet Gestell.
Dem froog een Frind emoal wieso
dat doch emoal ös so gekoame,
dat he söck hefft kein Wief genoame.
He hadd et doch da datoo,
dat he er Fru goot kann ternähre;
he sull em doch den Grund erkläre,
niegierig wehr he daropp sehr.
„Jä“, sähd Johann, „eenmoal da wehr
et all bienoah schon meist so wiet,
öck hädd op jede Fall gefriet.
Et ös nu her all twintig Jahr,
gefriet hadd öck ön eenem Haar,
bloß an e Kleenigkeit dat leeg,
dat datomoal dat nich gescheeg.
Een Wort bloß, - wer hadd dat gedocht, -
Hefft utenander ons gebrocht.
Een schlechtet Wort bloß sähd Marie,
da wehr et mött ons ganz verbie.
Joa, wie dat manchmoal söck so trefft,
dat so e Woort solk Wörkung hefft.“
„I, Schabber nich!“ sähd drop de Frind,
„öck denk, du moakst mi vär bloß Wind!
Wat fär e Woort ös dat gewese,
dat Ju op eenmoal trennt öm Böse?
Öck glow Di dat so leicht nicht, dat
een Woort die Wörkung hefft gehadd.“
„Joa, Joa“, sähd dropp de Junggesell,
„ös wahr, een Woort sähd de Marjell,
de wo mi da so sehr gefull.
Wie öck se froog, ob se mi wull,
sähd se dat kleene Woortke bloß:
„Näää!“ sähd de Krät, - da ging öck los.
„Näää!“ so e niederträchtget Woort,
da ging öck los ok foorts sofort!
„Näää!“ als wenn meckert so e Zäg.
Da ging öck gliek miener Weg.“